鎗火好型！
《我就係唔想講嘢》
鎗火之前，杜sir既戲入面，我最愛天若有情，果個年頭，冇一個雄性可以抵受得住華Dee牛仔褸加Ray-Ban鏡既魔力，但鎗火出現後，呢套戲成為我一生中最愛既戲之一。
杜sir一系列既幫會戲入面，由天若有情、鎗火、黑社會再去到放逐，都好似教緊我地點樣去做一個稱職既男人。寡言、有承擔、勇敢加一張唔太出眾既樣子就好似現實中既真男人一樣。
華Dee果種又型又識飛車既型男當然係我地男人典範，但坦白講大部份男人對呢個形象都只可以係心不能至，心嚮往之，如果個個都可以做劉德華，咁佢就唔會再係劉德華。
七十時代姜大衛狄龍果班最鋒利既刀形象我覺得已經要退落嚟，換上既應該係一啲外型起跑線比較低既造型，會令更多人受惠。
鎗火呢套戲我係十三年前朋友借vcd俾我睇，一睇完之後簡直不能自拔，直到現在，我依然保持住一個習慣，
就係如果我唔係有特別事做的話，你有線重播幾多次我就同你睇幾多次。每次只要聽到配樂我就覺得好興奮，果種細細個就睇打交『嚟喇嚟喇』既感情油然而生，諗起都high。
到上個月，我陪個仔睇緊飛天小女警果時發現呢套戲又重做，用一條霹靂大玉腸引誘之下我個仔就俾左個有線搖控我，我邊睇邊同個仔講「喇呢度好正架。」「喂呢度係咪好有型呀？」
最後我個仔只係拋低一句「都唔好睇既。」就行左入房玩Lego，算，我唔怪你，你得五歲，係未有需要做真男人住，大個你就知好睇。
杜sir話我知，男人唔使靚仔，你睇睇鎗火入面既肥雪；男人應該要有霸氣，你又睇下戲入面吳鎮宇衝埋去諗都唔諗就兜口兜面打左黃秋生幾多巴；男人講嘢唔使太多太清楚，任達華講嘢愈似語癌就愈有型。
我由細到大都好多嘢講，總係覺得說話講兩句點都清楚過一句，但我唔記得，對話係兩個人既事，我覺得兩句會清楚啲呢個觀念唔一定可以套用喺對方身上。慢慢，我學識慎言，雖然而家偶然都會中招，但起碼都可以由自己發覺出錯既地方。
寡言，起碼可以有一個好既形象，就算我把聲生得幾怪、說話技巧有幾差、又或者係話題有幾沉悶，寡言呢個動作已經可以幫我減去唔少既煩惱，到有一段時間我甚至覺得，只要我唔講嘢，就冇人可以睇穿我既內心。
以後，希望大部份人講男人的浪漫果時可以再加多一樣，就係一邊食火腩飯一邊飲青島，然後一邊睇鎗火。
鎗火配樂：
http://www.youtube.com/watch?v=Fp0KiMQ9ock
其實呢篇嘢我都唔知自己想講乜，只係睇返呢條配樂之後好想講一啲咁多年嚟我俾呢套戲影響到既觀念而已。
Search